श्वास आहे तर

▪️श्वास आहे तर...

श्वास आहे तर | आहे सर्वकाही 

त्याच्यापुढे नाही | काही मोठे 

श्वासांवर नाही | कुणाचीही सत्ता 

आर्थिक सुबत्ता | असो किती 

निसटतो जेव्हा | शेवटचा श्वास 

थांबतो प्रवास | आयुष्याचा 

श्वास निरंतर | चालतो जोवर

नसावे अंतर | नात्यांमध्ये 

जेव्हा हळूहळू | मावळते आशा 

निर्वाणीची भाषा | येते ओठी 

सार्थकी लागावा | शेवटचा श्वास 

हाच एक ध्यास | ठेवू सारे 

जीवनाची नौका | किनाऱ्याला लागो 

भाग्य सारे जागो | निजलेले 

आपोआप घेतो | पोटात 'सागर'

श्वासांची घागर | रिक्त होता 

▪️सागरराजे निंबाळकर, उल्हासनगर 

मो - 8879897797