माता पिता सेवा

💫     *माता पिता सेवा*     💫

*पुंडलिका तुझा । वाटे मज हेवा*

*माता पिता सेवा । मनोभावे ।।१।।*

*सारी तीर्थक्षेत्रे । मातृचरणात*

*पिता सदनात । हृदयाच्या ।।२।।*

*गायली अंगाई । शांत निजवाया*

*जीवापाड माया । माझ्यावरी ।।३।।*

*ठेचाळता पाय । अश्रू घळाघळा*

*आर्त कळवळा । काळजीने ।।४।।*

*घेतलेत कष्ट । उपाशी राहूनी*

*अपेष्टा साहूनी । प्रेमापोटी  ।।५।।*

*माता पिता माझे । विठू रखुमाई*

*शिवाची जिजाई । होती जैसी  ।।६।।*

*फेडावया ऋण । जन्मही अपुरा*

*शब्दांचा हा तुरा । त्यांच्यासाठी ।।७।।*

*यशासाठी माझ्या । झटती सदैव*

*लढावया चेव । संकटांशी ।।८।।*

*देवा पांडुरंगा । सुखी त्यांना ठेवा*

*घडो नित्य सेवा । हातुनिया ।।९।।*

*कशाला फिरू मी । आता चारीधाम*

*मायपिता नाम । जिव्हेवर ।।१०।।*

*झालो आज लीन । त्यांच्या चरणाशी*

*सुखाचिया राशी । सदोदित ।।११।।*

💫 *सागरराजे निंबाळकर* 💫

          उल्हासनगर, ठाणे

           ८८७९८९७७९७