------- उरला कुणी न वाली -------
माझ्याच आसवांना उरला कुणी न वाली
कळवू कशी मुक्याने ओठातली खुशाली
वृद्धाश्रमात आई रुग्णालयात बाबा
आहेत चार मुलगे पण काय वेळ आली
सांगायचे म्हणाली काहीतरी सखी पण
अस्वस्थ चेहऱ्याने आली तशी निघाली
दुर्लक्ष रोज करते लाखो चुका मुलांच्या
आईपरी जगी या कोणी कधी न झाली
रंगात रंगलेले झेंडे तऱ्हेतऱ्हेचे
नाचू कुणाकुणाच्या घेऊन मी मशाली
जमले कधी तुला जर भेटावयास ये तू
विरहातला अबोला काढू सये निकाली
नाते युगायुगांचे होते तरी सये का
सोडून साथ माझी गेलीस तू अकाली
जमिनीलगतच आहे शेरातला कवाफी
गझलेस येथ माझ्या उंची जरी मिळाली
@ सागरराजे निंबाळकर, उल्हासनगर
मो - ८८७९८९७७९७
No comments:
Post a Comment
आपल्या अभिप्रायाबद्दल मनःपूर्वक आभार !