~~ उशिरा कळले..
नव्हते माझे येथे काही उशिरा कळले
पर्वा नाही कोणालाही उशिरा कळले
धावत आहे जो-तो मागे आयुष्याच्या
उसंत नसते बसायलाही उशिरा कळले
फक्त मानले म्हणजे सारे अपुले नसते
"नाव" पाहिजे नात्यालाही उशिरा कळले
शल्य बोचते मनास जेव्हा उठता-बसता
कठीण जाते जगायलाही उशिरा कळले
सहजासहजी प्रकाश पडतो कधी कुठे का?
धैर्य लागते जळायलाही उशिरा कळले
■ सागरराजे निंबाळकर
No comments:
Post a Comment
आपल्या अभिप्रायाबद्दल मनःपूर्वक आभार !