संधीसाधू

▪️संधीसाधू

स्वार्थ साधावया । येतात जवळ

भलते चपळ । संधीसाधू ।।१।।

लटक्या शब्दांनी । झोळी भरायची 

स्तुती करायची । काम त्यांचे ।।२।।

चूक दिसूनही । बघेनात काही

धजावत नाही । सांगायला ।।३।।

असतात कंपू । यांचे चोहीकडे

भरावया घडे । प्रसिद्धीचे ।।४।।

ठेवती हाताशी । नित्य एखाद्याला

जपावया माला । कौतुकाची ।।५।।

वाऱ्याच्या दिशेने । उडतो पतंग

बदलती रंग । तैसे यांचे ।।६।।

लावू पाहिल्यास । कोणी लाडीगोडी

द्यावी शालजोडी । सन्मानाने ।।७।।

नसतो कामाचा । फुकाचा जागर

सांगतो 'सागर' । भामट्यांना ।।८।।

▪️सागरराजे निंबाळकर