शिवशंभो

▪️शिवशंभो

त्रिगुणी जगात । मृत्यू हा शाश्वत

त्याचेच दैवत । शिवशंभो ।।१।।

आशेचा किरण । शिवाचे स्मरण

टाळते मरण । शिवशंभो ।।२।।

श्रावणात व्रत । सोमवार त्यात

भक्त पूजतात । शिवशंभो ।।३।।

रुद्र अभिषेक । रूपेही अनेक

स्मरतात कैक । शिवशंभो ।।४।।

बेल, फळ, पान । दुग्ध जल स्नान

भक्तीचा सन्मान । शिवशंभो ।।५।।

शोभतसे छान । नंदीचे वाहन

पार्वतीचे धन । शिवशंभो ।।६।।

चक्र जीवनाचे । भाव भावनांचे

दान प्राक्तनाचे । शिवशंभो ।।७।।

भक्त पुष्पदंत । शिव महिम्नात

आदरे स्तवात । शिवशंभो ।।८।।

जगण्याची ओढ । जीव हा विमूढ

राखतसे गूढ । शिवशंभो ।।९।।

दुःखाचा विसर । व्रत सोमवार

करी चमत्कार । शिवशंभो ।।१०।।

▪️सागरराजे निंबाळकर, उल्हासनगर