▪️खेळ राबत्याचा...
पेरता आले न मजला चार दाणे
ऐनवेळी घात केला पावसाने
जीवनी जर पेच पडला उत्तरांचा
सोडवावे प्रश्न सारे संयमाने
शेंदराचे दगड गोटे बाटले अन्
होत गेला घात नकळत आकसाने
होत नाही ध्येय प्राप्ती फक्त धावुन
सिद्ध केले जिंकणाऱ्या कासवाने
काय कामाची इथे ही यंत्र इतुकी
माणसाला गाळले जर माणसाने
ठेंगणे झाले खरोखर मेघ सारे
गोड पापा मज दिल्यावर नातवाने
खेळ आहे सर्व 'सागर' राबत्याचा
होत नाही गझल केवळ काफियाने
▪️सागरराजे निंबाळकर
No comments:
Post a Comment
आपल्या अभिप्रायाबद्दल मनःपूर्वक आभार !