खरंय ना हे

▪️खरंय ना हे..?

चुकले असेल अपुले काही खरंय ना हे?

क्षमा, याचना सुटका नाही खरंय ना हे?

मला वाटले असेल बहुदा दुःखामध्ये

दिसली नाही खंत जराही खरंय ना हे?

ओघामध्ये सगळे झाले असेलही पण..

व्यक्ती होती शांत, प्रवाही खरंय ना हे?

भरीव होते दिसायला पण.. आत पोकळी

कळला नाही भेद कुणाही खरंय ना हे?

हवे तितकेच घ्यावे-द्यावे सदैव कारण..

विचका करतो एक खडाही खरंय ना हे?

तिला कसा मी दोषी ठरवू जगापुढे या

भरकटलेलो पूर्ण स्वतःही खरंय ना हे?

हाक मारली कधी ना मला "राम" जगाने

का पाळू मग "मर्यादाही"? खरंय ना हे?

लेक म्हणूदे "येते बाबा" बघा मग कसा..

फुटतो पाझर "पुरुषालाही" खरंय ना हे?

🌿 सागरराजे निंबाळकर, कल्याण

मो - ८८ ७९८९ ७७९७