लपवत नाही

अर्धक्षामा : गागागागा गाललगागा

लपवत नाही..

बघतो केवळ बोलत नाही

कारण काही समजत नाही

श्रीमंताला निर्मळ गंगा

गरिबाला ही सवलत नाही

मित्रांना मी जोडत जातो

दुसरं काही कमवत नाही

थोड्याने पण ओंजळ भरते

जास्ती काही लागत नाही

झेलत ओझे खंगत जातो

पण मी नाती तोलत नाही

जे दिसते ते ओळख माझी

पडद्यामागे लपवत नाही

आहे थोडा माज मलाही

पडलेलं मी उचलत नाही

विसरुन सारे हासत जा तू

ओले डोळे बघवत नाही

ठरले आहे जर सगळे, तर..

जा तू, माझी हरकत नाही

🌿 सागरराजे निंबाळकर, कल्याण