राया

▪️कुडी नि पैंजण आणा राया..

नका दाखवू, खोटी माया

कुडी नि पैंजण, आणा राया ।।धृ।।

सांजसकाळी, झुरते दारी

कुठे हरवली, आहे स्वारी

दर्शन तुमचे, होण्या स्वामी

शोधत असते, युक्ती नामी

खुल्या मनाने, निवांत अगदी

बसा मंचकी, मज ऐकाया ।।१।।

लाजेने मी, किती अवघडू

हात राजसा, नका न पकडू

येईल कुणी, सोडा ना मज

उगा हेरता, अलगद सावज

बरी नव्हे ही, घाईघाई

ठेवा संयम, प्रेम कराया ।।२।।

घडायचे जे, घडून जाते

भक्कम राहो, अपुले नाते

उमा मी, तुम्ही.., भोळा शंकर

हवाय मजला, गणेश लवकर

संकटातही, टिकून राहू

शिरी असू दे, तुमची छाया ।।३।।

🌿 सागरराजे निंबाळकर, उल्हासनगर