आपापला प्रांत

▪️आपापला प्रांत..

घासातला घास । देता येतो ज्याला

ज्ञात खरी त्याला । माणुसकी ।।१।।

आधार शब्दांचा । फक्त धीर देतो

तात्पुरता नेतो । शांततेत ।।२।।

प्रवास सोबत । हातामध्ये हात

तीच खरी साथ । संकटात ।।३।।

कळतो माणूस । संकटात खरा

आटताना झरा । मदतीचा ।।४।।

जो जसा वागेल । तसा प्रतिसाद

खोटा आशावाद । नको उगा ।।५।।

जमाना भल्याचा । उरलेला नाही

माया, प्रेम काही । कुठे आहे? ।।६।।

गोतावळ्यापेक्षा । चांगला एकांत

आपापला प्रांत । पाहू आता ।।७।।

🎯 सागरराजे निंबाळकर