कोई और मिल गया होगा

दिल आया होगा या दिल गया होगा

फुल मुहब्बत का ज्यादाही खिल गया होगा

ऐसेही नहीं बदलते तेवर किसीके

यकीनन तुझे कोई और मिल गया होगा

😊 सागरराजे

ठेऊ काळजात

~~ ठेऊ काळजात

ऋतू पावसाळी अन्, त्यात तुझी साथ

एकरूप होती जसे, तेल आणि वात ||धृ||

ठेच मला लागते नि, पाणी तुझ्या डोळी

लाखात एक आपली, जोडी साधीभोळी

निरांजन होईन मी, ओवाळण्या तुला

घेऊ सुखाने हिंदोळे, बांधू असा झुला

तुझ्यापाशीच शेवट, तूच सुरूवात ||१||

नको शपथा कुठल्या, नकोत वचने

राणी आपली कायम, जुळतील मने

भांडेल जो आधी तोच, घेईल माघार

अलिखित एक असा, करूया करार

लाख येऊदे संकटे, सोडू नको हात ||२||

तुझ्या माझ्या संसाराची, न्यारीच कहाणी

लिहाया घेतली तर, गाजतील गाणी

जगू स्वच्छंद नेहमी, मोजू नको वय

जीवनी कधी कुठला, नको अभिनय

युगेयुगे एकमेका, ठेऊ काळजात ||३||

😊 सागरराजे निंबाळकर, कल्याण

पावसाळा

~~ पावसाळा..

डोळ्यात स्पष्ट दोन्ही दिसतोय पावसाळा

होऊन चिंब इतका भिजतोय पावसाळा

आयुष्य फार थोडे हाती असूनसुद्धा

फुलवून रान सारे जगतोय पावसाळा

प्रेमात काय पडला या गोजिऱ्या धरेच्या

होऊन पार वेडा हसतोय पावसाळा

जावे कसे कळेना सोडून पालवीला 

चिंतेत याच एका झुरतोय पावसाळा

एकीकडे उभा मी एकीकडे दुरावा

पाहून या दरीला रडतोय पावसाळा

@ सागरराजे निंबाळकर

हल्ली

😊 हल्ली

होता आधी तसा पडेना प्रभाव माझा हल्ली

भरूनही का रिता भासतो तलाव माझा हल्ली

झेलत होतो वादळवारे एकेकाळी सगळी

पण.. लागेना झुळूकेपुढे निभाव माझा हल्ली

दिसू न देता रडायचो मी ठेऊन हसू ओठी

हरवले कसब पडतोय कमी सराव माझा हल्ली

कातडी नव्हे काळीज दिले वाघाचे मी ज्यांना

खटकत आहे शेळ्यांना त्या ठराव माझा हल्ली

शेतीवाडी, जमीनजुमला सर्व पाहिजे आता

विवाहसंस्था कमी करेना दबाव माझा हल्ली

आयुष्य तुला बहाल केले म्हणायची जी पूर्वी..

तिला दिसेना थोडासुद्धा अभाव माझा हल्ली

🫵🏻 सागरराजे निंबाळकर

बा विठ्ठला

~~ बा विठ्ठला

वारीत दुःखाचे | होवो विसर्जन

सुखावूदे मन | बा विठ्ठला ||१||

नाही माझ्या मनी | फार मोठी आस

होऊदे विकास | थोडा-थोडा ||२||

आहे मी विठ्ठला | चुकांचा पुतळा

लावतोस लळा | तरी मला ||३||

शांत होते मन | तुझ्या राऊळात

आधाराचा हात | जणू काही ||४||

नव्हती कधीही | चिंता प्रपंचाची

तुला पाहण्याची | ओढ फक्त ||५||

कळस पाहू की | पाहू मी पायरी

होतसे अंतरी | घालमेल ||६||

सागराच्या लाटा | जशा येती-जाती

तसा तू सांगाती | राहा माझ्या ||७||

🚩 सागरराजे निंबाळकर, कल्याण

बातें अनकही

फासले बढ़ चुके हैं दरमियान 

फिक्र भी पहले जैसी नहीं रही

जिक्र कौन कौनसी बात का करें

चलो रहने दो कुछ बातें अनकही

@ सागरराजे 

कसे ठरवू

~~ कसे ठरवू..

तुलाही वाटते का ते? मला जे वाटते आहे 

असे काहीच नाही तर कशाला लाजते आहे?

तुझ्या प्रेमात पडल्यावर उघड झाले नव्याने की

क्षणिक सारेच तू निव्वळ मला उपभोगते आहे

गझल मी गायली अवघी हसू ठेऊन ओठी पण..

जखम जी आत आहे ती मनाला टोचते आहे

नको सोने, नको चांदी मला द्या भाकरी केवळ

निरागस भूक आशेने जरासे मागते आहे

कुणी म्हणतो गजल याची, कुणी म्हणतो गझल त्याची

कसे ठरवू गझल नक्की कुणावर भाळते आहे

😊 सागरराजे निंबाळकर, कल्याण

बाप घ्यावा समजून

~ बाप घ्यावा समजून

भार अवघ्या घराचा

बाप सहज पेलतो

सुख असो किंवा दुःख

बाप खुलून हसतो

त्याच्या तोंडून कधीही

मला आला न नकार

दिले आम्हाला रोखीने

स्वतः राहिला उधार

तोच भिंत मजबूत

तोच छप्पर घराचे

कुणा-कुणाला सांगू मी

मोल बाप असण्याचे

आहे सोबत तोवर

बाप घ्यावा समजून

ज्याने वाढवले आहे

पाणी रक्ताचं करून

बाप पंढरीचा विठू

बाप तुकोबाची गाथा

करू नमन बापाला

पायी टेकवून माथा

@ सागरराजे निंबाळकर, कल्याण

अवघड होते

😇 अवघड होते

पोटामध्ये जेव्हा माझ्या गडबड होते

उठणे-बसणे, खुलून हसणे अवघड होते

लग्नाआधी वाटत होत्या गप्पा ज्या-ज्या

त्या-त्या नंतर नकोनकोशी बडबड होते

विभा वाटली इंस्टावर जी वल्लभ होता

घाई नडते आणि नेमकी पडझड होते

एक अप्सरा केवळ क्षणभर समोर होती

तरी वर्षभर हृदयामध्ये धडधड होते

नजर शेकतो जमेल तिकडे राघोबा पण..

दिसली मैना इतर कुठे की तडफड होते

@ सागरराजे निंबाळकर, कल्याण

चूक झाली खरी

~~ चूक झाली खरी..

वाचताना तुला चूक झाली खरी

वाटला डोह जो ती निघाली दरी

फार होते तुझे चोचले जीवना

पेच सुटला तुझा प्राण गेल्यावरी 

पाहिजे तेवढे छान होतात का?

शेर गझलेतले रोज लिहिल्यावरी

उंच कळसापरी आस नाही मनी

दे मला भेट तू विठ्ठला पायरी

नाव घेतो तुझे कोण मीरे इथे..

फक्त ध्यानीमनी सावळा श्रीहरी

कर्म समजायचे की म्हणू दुर्दशा?

एकटा बाप अन् चार वाटेकरी

रोज हसणे मला भाग आहे "किरण"

वेदना आतली आत कुढली जरी

▪️सागरराजे निंबाळकर, कल्याण