ठेऊ काळजात

~~ ठेऊ काळजात

ऋतू पावसाळी अन्, त्यात तुझी साथ

एकरूप होती जसे, तेल आणि वात ||धृ||

ठेच मला लागते नि, पाणी तुझ्या डोळी

लाखात एक आपली, जोडी साधीभोळी

निरांजन होईन मी, ओवाळण्या तुला

घेऊ सुखाने हिंदोळे, बांधू असा झुला

तुझ्यापाशीच शेवट, तूच सुरूवात ||१||

नको शपथा कुठल्या, नकोत वचने

राणी आपली कायम, जुळतील मने

भांडेल जो आधी तोच, घेईल माघार

अलिखित एक असा, करूया करार

लाख येऊदे संकटे, सोडू नको हात ||२||

तुझ्या माझ्या संसाराची, न्यारीच कहाणी

लिहाया घेतली तर, गाजतील गाणी

जगू स्वच्छंद नेहमी, मोजू नको वय

जीवनी कधी कुठला, नको अभिनय

युगेयुगे एकमेका, ठेऊ काळजात ||३||

😊 सागरराजे निंबाळकर, कल्याण