जी न झाली कधी तीच सुरुवात मी
एकटी नांदते रोज दोघात मी
आठवेना अता नाव माझे मला
गुंतले एवढी आडनावात मी
मत जसे मांडले स्पष्ट सर्वांपुढे
येत गेले तशी फार वादात मी
बोलणे मोजके हासणेही विरळ
सांग घ्यावा कसा श्वास शहरात मी
चार भिंतीतल्या गार वाऱ्यामुळे
गोठते सारखी आतल्या आत मी
"शुक्र" म्हणतो कुणी कोण म्हणतो "शनी"
दाखवावा कुणा नेमका हात मी
खर्च करतोस तू वीस ओळी उगा
मांडतो तेवढे फक्त शेरात मी
😊 सागरराजे निंबाळकर, कल्याण
No comments:
Post a Comment
आपल्या अभिप्रायाबद्दल मनःपूर्वक आभार !