खयाल म्हणजे

~ खयाल म्हणजे..

शेरामधला अर्थ जसजसा बहरत जातो

प्रगल्भतेचा ठसा तसतसा उमटत जातो

किती वाचल्या कविता त्याला महत्व नाही

कोण कोळसा अन् हिरा रसिक ठरवत जातो

गल्लीमध्ये ज्याचा कोणी वाचक नसतो

"गौरव" साधा दिल्लीभर तो मिरवत जातो

विदर्भ, कोकण, नाशिक अथवा पुणे-मुंबई

जो-तो मोठा कवी स्वतःला समजत जातो

माझ्यालेखी खयाल म्हणजे "कोरी पाटी"

मनासारखा येईस्तोवर गिरवत जातो

😇 सागरराजे निंबाळकर, कल्याण