करावे चिंतन

🌿 करावे चिंतन..

कोणत्याही क्षणी । काहीही घडते

हातात नसते । वेळ कधी ।।१।।

"जर-तर" गोष्ट । शक्यतो टाळावी

जाऊ नये गावी । भाकितांच्या ।।२।।

कुवत अपुली । स्वतः ओळखावी

कल्पना निनावी । कशापायी? ।।३।।

अति चंचलता । संकटात नेते

पदोपदी देते । धडा मोठा ।।४।।

अर्धवट ज्ञान । उथळ स्वभाव

दावतो अभाव । स्थिरतेचा ।।५।।

दिसामाजी थोडे । करावे चिंतन

स्थिरावते मन । एकाजागी ।।६।।

आयुष्य म्हणजे । अथांग सागर

भरावी घागर । सत्कर्मांनी ।।७।।

🌿 सागरराजे निंबाळकर, कल्याण