ज्ञानामृत गंगा

------- ज्ञानामृत गंगा -------

अधिकारवाणी । मिळते ज्ञानाने

जपावी कर्माने । नित्य तिला ।।१।।

असावे लागते । सारे सुसंगत 

तेव्हाच रंगत । येते खरी ।।२।।

क्षणिक मोहाने । तृष्णा का भागते 

करावी लागते । तपश्चर्या ।।३।।

अपत्य अपुले । साऱ्यांनाच प्रिय 

करावे सक्रिय । त्याचे त्याला ।।४।।

सोपे नाही येथे । हवे ते साधणे 

निष्फळ कारणे । पुरे आता ।।५।।

वाहू द्यावी दारी । ज्ञानामृत गंगा 

भुलू नये रंगा । प्रसिद्धीच्या ।।६।।

संयमाने मोजा । सागराची खोली 

होऊ नये ओली । काया फक्त ।।७।।

@ सागरराजे निंबाळकर, उल्हासनगर 

मो - ८८७९८९७७९७