अक्षरांचा मेळ

------- अक्षरांचा मेळ -------

साधावा लागतो । अक्षरांचा मेळ

सोपा नव्हे खेळ । छंदोबद्ध ।।१।।

उच्च यमकांचे । शब्द योजल्यास

उंची आशयास। आपसूक ।।२।।

करून आरंभ । लिहा चाराक्षरी

लिहा षडाक्षरी । सरावाला ।।३।।

सम अक्षरात । सांगड शब्दांची

आठ अक्षरांची । अष्टाक्षरी ।।४।।

हवी प्रमाणात । गेयतेची गती

सांभाळावी यती । गीतामध्ये ।।५।।

गजलेचा मोह । होतो अनेकांना

गुंफण्या शब्दांना । वृत्तामध्ये ।।६।।

पोवाडे गाताना । उंची आवाजाची

वाटावी वाघाची । डरकाळी ।।७।।

कठोर शब्दांचा । मार्मिक फटका

लावतो चटका । काळजाला ।।८।।

'ट' ला 'ट' प्रपंच । वाटे जरी साधा

आशयाला बाधा । येते त्याने ।।९।।

असतो पुष्कळ । हातात अवधी

शोधा योग्य संधी । संयमाने ।।१०।।

लाभो सकलांना । साथ शारदेची

शब्दसंपदेची । कृपा नित्य ।।११।।

@ सागरराजे निंबाळकर, उल्हासनगर

मो - ८८७९८९७७९७