जगूया वर्तमानात

------- जगूया वर्तमानात -------

नव्याने काही करावं म्हणताना

प्रश्न जुनेच, मला भेडसावले

मन आणि हृदयाच्या द्वंद्वात

पहिल्यांदा नेत्र ही सरसावले

पापण्यांचा दोष नसताना काही

रात्रभर त्यांनाही जागावं लागलं

चला जगूया वर्तमानात पुन्हा

आठवात रमून कुणाचं भागलं

पुन्हा कधीतरी होईलच चर्चा

जिव्हा अन कर्णाला साक्षी ठेवून

तोवर मी जगतो खुशालीने

आयुष्या तू ये, नवे रूप लेवून

आशा-आकांक्षांचंही ऐकू थोडं

नेमकं त्यांचं म्हणणं काय

अन्यथा, कासावीस व्हायचा जीव

अन गळून पडायचे हातपाय

अशातच जाण होते वास्तवाची

सोडवताना प्रश्न पोटा पाण्याचा

कल जातो कागदी नोटांकडे

नाद होता चलनात नसलेल्या नाण्यांचा

🤗 सागरराजे निंबाळकर