----- बाप नावाच्या वृक्षाचं -----
(१४ अक्षरी गीत)
बाप नावाच्या वृक्षाचं, फळ किती गोड
चाखावया मुलांमध्ये, सदा चढाओढ !! धृ !!
ऊन वारा पावसात, बापाची सावली
माळ संस्कारांची त्याने, हृदयी लावली
भव्यदिव्य काया जसा, मंदिरी गाभारा
त्याच्या मिठीत लाभतो, अनोखा सहारा
कर्तृत्वाला त्याच्या उभ्या, जगी नाही तोड !! १ !!
घाम गाळून शेतात, पिकवितो मोती
तोच दिवा अन तोच, दिव्यातील ज्योती
तोंड दिले संकटांना, फोडले न फाटे
अनवाणी पायानेच, तुडवीत काटे
भेगाळले पाय कधी, तळहाती फोड !! २ !!
लेक जाताना सासरी, दाबतो हुंदका
भाळी नाही त्याच्या कधी, निवांत घटका
बोल खडे लावू नका, कधीही बाबाला
अत्तराचा गंध त्याच्या, कष्टाळू घामाला
आई वेल जाईचा नि, बाप घट्ट खोड !! ३ !!
@ सागरराजे निंबाळकर, उल्हासनगर
संपर्क :- ८८७९८९७७९७ / ९३२४७४९७९२
No comments:
Post a Comment
आपल्या अभिप्रायाबद्दल मनःपूर्वक आभार !