तुझ्यामुळे मी

🤗 तुझ्यामुळे मी..

केला आहे प्रवास इथवर तुझ्यामुळे मी

दूर सारली अंतिम घरघर तुझ्यामुळे मी

जाळत असतो आत उन्हाळा नको तेवढा

पण दाखवतो श्रावण वरवर तुझ्यामुळे मी

धावत होतो "इच्छांसोबत" इकडे-तिकडे

आजघडीला बघ स्थिरस्थावर तुझ्यामुळे मी

बाई म्हणजे "सत्ता" नाही उपभोगाया

बोलू शकतो खुलून यावर तुझ्यामुळे मी

हाक मारते आई "बाळा" अजूनही पण..

झालो दुनिये मोठा लवकर तुझ्यामुळे मी

दगडालाही लाज आणली एकेकाळी

खरे सांगतो बनलो पाझर तुझ्यामुळे मी

वैरी होता नजरेमध्ये माझ्या जो-तो

आता करतो प्रेम जगावर तुझ्यामुळे मी

🌿 सागरराजे निंबाळकर, कल्याण

मो - ८८ ७९८९ ७७९७