काठीसंगे

▶️ काठीसंगे..

वृद्धत्वाच्या, काठीसंगे

करायचा मी, प्रवास कुठवर

ईश्वरा अता, होऊदे मज

वैकुंठाचे, दर्शन लवकर

हयात सरली, जपण्यामध्ये

मने नि मर्जी, ह्याची-त्याची

कमीच पडलो, तरी तसूभर

हीच अवस्था, प्रत्येकाची

आई-बाबा, दोन्ही झालो

तरी न माया, मुलास कळली

सूर्य न दिसला, कधी पहाटे

सांज देखील, तशीच ढळली

खांदे माझे, खंगत गेले

सतत पेलून, भार घराचा

होत असतील, किती यातना

विचार केला, कुणी न याचा

एक समजले, मला शेवटी

द्यावे तितके, कमीच असते

नातीगोती, नावापुरती

गरजेवेळी, कुणीच नसते

🌿 सागरराजे निंबाळकर, कल्याण

मो - ८८ ७९८९ ७७९७