व्याख्या वास्तवाची

▪️ व्याख्या वास्तवाची ▪️

स्वप्नांची दुनिया । असते क्षणांची

खात्री आनंदाची । नाही त्यात ।।१।।

गोष्टी अधांतरी । करू नये कधी

हातात अवधी । असताना ।।२।।

वेळीच जाणावे । मोल जीवनाचे

भान वास्तवाचे । ठेवोनिया ।।३।।

उत्तुंग वाटतो । इवलासा हर्ष

वास्तवाचा स्पर्श । झाल्यावर ।।४।।

भौतिक सुखाचा । नको बडेजाव

वास्तवाचा ठाव । घ्यावा नित्य ।।५।।

कितीही वाटले । न्यावे सर्वकाही

नेता येत नाही । शेवटाला ।।६।।

मनातली मूर्ती । आकारास येते

साक्ष साऱ्या देते । वास्तवाची ।।७।।

व्याख्या वास्तवाची । आहे साधी-सोपी

घालू नये टोपी । कधी कोणा ।।८।।

▪️ सागरराजे निंबाळकर, उल्हासनगर