गुरु करावा जीवनी

----- गुरु करावा जीवनी -----

एक तरी गुरु । करावा जीवनी

मिळे संजीवनी । चैतन्याची ।।१।।

गुरुविना नाही । शिक्षणा महत्व

जगण्याचे सत्व । त्यात सारे ।।२।।

बोट धरूनिया । पाय चालतात

माता आणि तात । आद्य गुरु ।।३।।

होते वाटचाल । योग्य मार्गावर

आनंदे, सुकर । गुरुंमुळे ।।४।।

गुरु असतात । ज्ञानाचा आगार

मानावे आभार । पदोपदी ।।५।।

अज्ञानास ज्ञान । देतसे अफाट

अंधारात वाट । दावी गुरु ।।६।।

गुरूंना नेहमी । द्यावा योग्य मान

ठेवोनिया जाण । संस्कारांची ।।७।।

आहे गुरुंमध्ये । त्रिमूर्तीचा वास

स्पर्श चरणास । करू त्यांच्या ।।८।।

राजा असो रंक । व्हावया विकास

हवा प्रत्येकास । गुरु एक ।।९।।

➡️ सागरराजे निंबाळकर, उल्हासनगर

मो - ८८७९८९७७९७