माझे लाड पुरवते
हवं नको ते पाहत
रोप वाढाया जोमाने
जसं कामी येतं खत
जरी असली वहिनी
मला आईच वाटते
जेव्हा-जेव्हा ताटामध्ये
भाजी-भाकरी वाढते
घरामध्ये कुठे, काय
तिला ठाऊक असते
तिच्याविना एकाचेही
पान कधी ना हलते
पत्नी, आई, सून, ताई
निभावते सारी नाती
भार अवघ्या घराचा
पेलूनिया एकहाती
मोठी असो किंवा छोटी
एक वहिनी असावी
जिच्या सहवासामध्ये
गोडी जीवनाला यावी
@ सागरराजे निंबाळकर, कल्याण
No comments:
Post a Comment
आपल्या अभिप्रायाबद्दल मनःपूर्वक आभार !