येऊदे दिवाळी

----- येऊदे दिवाळी -----

लावूनिया आज । लक्ष दीप द्वारी 

करू सृष्टी सारी । तेजोमयी ।।१।।

लक्ष्मीची पाऊले । लागती ज्या घरा 

'वास' तेथे खरा । समृद्धीचा ।।२।। 

धनत्रयोदशी । दिवाळी पाडवा 

हक्काने वाढवा । गणगोत ।।३।।

चिवडा, चकली । बेसनाचे लाडू 

ताटामध्ये वाढू । आग्रहाने ।।४।।

शंकरपाळीचा । वेगळाला ढंग 

वाढवितो रंग । फराळाचा ।।५।।

फराळासारखे । व्हावे एकरूप 

वाढतो हुरूप । सलोख्याने ।।६।।

भाऊबीजेसाठी । येतो भाऊराया

डोळ्यामध्ये माया । साठवून ।।७।।

सणानिमित्ताने । होती सारे गोळा 

पाणी येते डोळा । आनंदाने ।।८।।

राजा असो रंक । प्रत्येकाच्या भाळी 

येऊदे दिवाळी । उत्साहाने ।।९।।

@ सागरराजे निंबाळकर, उल्हासनगर 

मो - ८८७९८९७७९७