अक्षरगणवृत्त - कलापति
अक्षरे – १३ (यति ८,५)
गण – र ज र ज ग
मात्रा – २०
लगावली - गालगाल गालगाल गालगाल गा
------- वेदना खुणावतेच -------
मोद आज काळजास वाटला जरी
वेदना खुणावतेच रोज अंतरी !! धृ !!
साम दाम दंड भेद क्रोध माळतो
का उगाच दुःख रोज तू उगाळतो
हेत आपुला जरी न साध्य जाहला
सांग फक्त या सुखात कोण नाहला
संतसंग आचरून धाव सत्वरी !! १ !!
रोजच्या विवंचनेत दाह भेटला
चालतोय मीच येथ मार्ग एकला
ठेच लागली तरी न वाट सोडली
वेदनेत गीत गात नाळ जोडली
रीत हीच जीवनात पाळतो खरी !! २ !!
चांगले जगी दिसेल योग्य पाहता
भक्तिभाव काळजात नित्य वाहता
खंत बाळगू नकोच मार्ग एवढे
मोगरा जुई गुलाब गंध केवढे
एक एक दीपमाळ लाव तू घरी !! ३ !!
@ सागरराजे निंबाळकर
No comments:
Post a Comment
आपल्या अभिप्रायाबद्दल मनःपूर्वक आभार !